Mbrëmja Gala “Topi i Artë 2025” që do të mbahet mbërmjen e sotme në Teatrin e Operas dhe Baletit do të nderojë me trofe protagonistët e futbollit shqiptar përgjatë këtij viti.
Federata Shqiptare e Futbollit në këtë ceremoni do të shpërndajë në total 9 trofe duke nisur nga talentet (djem e vajza), te golashënuesit më të mirë (djem e vajza), trajneri i vitit, arbitri i vitit, 11-shja më e mirë e kampionatit si edhe fituesit e kategorisë “Topi i Artë (djem e vajza). Sakaq, dy trofe do t’i akordohen futbollistëve të Kombëtares shqiptare: “Zemra Kuqezi” dhe “Lojtari i vitit i Kombëtares”.
Për fituesin e çmimit “Zemra Kuqezi” kanë votuar tifozët e klubit të Kombëtares, përmes një votimi online të fshehtë. Ndërsa për fituesin e çmimit “Lojtari i vitit i Kombëtares”, kanë votuar vetë futbollistët e ekipit tonë kombëtar. Fituesi i secilit prej çmimeve do të zbulohet mbërmjen e sotme në këtë ceremoni Gala. Siç është e traditës tashmë do të ketë të ftuar edhe nga ambasadorët e futbollit botërorë që do të jenë të pranishë në këtë mbërmje për të nderuar më të mirët e futbollit. Top Channel mëson se ylli i mbërmjes së sotme do të jetë ylli argjentinas i Interit dhe Realit të Madridit, dy prej shumë klubeve ku ai ka luajtur, Esteban Cambiasso, i cili do të dorëzojë trofeun Këpuca e Artë.
Gjatë karrierës së tij, Cambiasso fitoi 21 tituj zyrtarë, shumica e të cilëve u fituan gjatë dhjetë sezoneve të tij tek Interi, duke përfshirë pesë Scudetto dhe dhe Champions Leagu në edicionin 2009/2010.
Në karrierën e tij me përfaqësuesen, ai ishte pjesë e Argjentinës nga viti 2000 deri në vitin 2011, ku luajti 52 ndeshje dhe përfaqësoi vendin tij në Kupën e Botës 2006, Kupën e Konfederatave 2005 dhe në Kupën e Maerikës në dy edicione 2007 dhe 2011. Kujtojmë që Cambiasso ka qenë edhe një prej alternativave për të drejtuar Kombëtaren kuqezi, përpara emërimit të Sylvinhos rreth 3 vite më parë.
Gjithashtu në këtë mbrëmje do të jetë i pranishëm edhe një prej ish-arbitrave më të famshëm në botë, si italiani Gianlucca Rochi, me një karrierë të artë në gjykimin e futbollit europian dhe botëror për 17 vite, ku në 10 prej tyre ishte pjesë e kategorisë Elite të arbitrave të FIFA-s.
