Dy diplomatë të njohur norvegjez po hetohen nga autoritetet norvegjeze për shkak të lidhjeve të tyre me pedofilin e ndjerë, Jeffrey Epstein. Njësia për krime financiare e Norvegjisë, Økokrim, ka hapur hetim ndaj Monu Juulit, e cila dha dorëheqjen nga pozicioni i ambasadores në Jordan dhe Irak të dielën, për dyshim për korrupsion të rëndë gjatë punës së saj në Ministrinë e Punëve të Jashtme.
Bashkëshorti i saj, Terje Rød-Larsen, ish-diplomat dhe ish-president i Institutit Ndërkombëtar të Paqes (IPI), po hetohet për dyshim për bashkëfajësi në korrupsion të rëndë. Drejtori i Økokrim, Pål Lønseth, tha se është hapur një hetim. “Kemi hapur një hetim për të sqaruar nëse kanë ndodhur veprime kriminale. Kemi një hetim të gjerë dhe afatgjatë”.
“Mes të tjerash, Økokrim do të hetojë nëse [Juul] ka përfituar përfitime në lidhje me pozicionin e saj”, shtoi Lønseth. Avokatët e Juul-it dhe Rød-Larsen kanë deklaruar se klientët e tyre po bashkëpunojnë me hetuesit dhe janë të bindur se akuzat do të rezultojnë të pabazuara.
Çifti, i cili ka qenë pjesë e grupit të vogël të diplomatëve që lehtësoi Marrëveshjet e Oslo-s (1993-1995), është i fundit nga emrat e rëndësishëm norvegjez që dalin në dritë lidhur me dosjet e Epstein. Këto zbulime kanë shkaktuar tronditje në Norvegji, kryesisht për shkak të lidhjes së Epstein me Princeshën e Kurorës, Mette-Marit, por edhe për lidhjet e tij me figura të tjera të njohura.
Økokrim tashmë ka hapur hetim edhe ndaj Thorbjørn Jagland, ish-kryeministër i Norvegjisë nga Partia Laburiste, ish-kryetar i Komitetit Norvegjez të Nobelit dhe ish-sekretar i përgjithshëm i Këshillit të Europës. Vetëm përmendja në dosje nuk nënkupton automatikisht shkelje ligjore apo veprim kriminal. Mette-Marit ka shprehur keqardhje të thellë për lidhjen me Epstein, duke pranuar se “nuk e ka peshuar mire situatën”.
Dokumentet e publikuara nga Departamenti i Drejtësisë i SHBA-ve tregojnë se dy fëmijët e Juulit dhe Rød-Larsenit kanë përfituar $10 milion nga Epstein dhe se Rød-Larsen ishte emëruar ekzekutor i testamentit të Epstein në 2017 (emërimi më pas u revokua). Sipas dokumenteve, ata kanë vizituar ishullin privat të Epstein me fëmijët e tyre në 2011, ndërsa Rød-Larsen e ka falënderuar më vonë milionerin për udhëtimin, duke e përshkruar ishullin si “plotësisht unik”. Në një email, ai shkroi: “Të gjithëve na pëlqeu shumë!”.
Duke njoftuar dorëheqjen e Juulit, Ministri i Jashtëm norvegjez, Espen Barth Eide, tha se kontaktet e saj me Epstein kishin “zbuluar një dështim serioz në gjykim”. “Situata e bën të vështirë rikthimin e besimit që kërkon ky pozicion i lartë pune”. Avokati i Juulit, Thomas Skjelbred, tha se ishte ngritur një “akuzë serioze” ndaj klientes së tij. “Njëkohësisht, ajo e sheh pozitivisht që akuzat tani do të jenë pjesë e një hetimi të plotë, duke lejuar që rrethanat reale të sqarohen. Klientja ime nuk njeh akuzat e ngritura kundër saj”.
Juul, ish-ambasadore në Britani dhe Izrael, do të paraqitet për marrjen e dëshmisë tek Økokrim gjatë kësaj jave dhe do të bashkëpunojë me hetimet e Ministrisë së Jashtme. Avokati i Rød-Larsen, John Christian Elden, tha se ai ka marrë dijeni për akuzën për bashkëfajësi në korrupsion midis 2011 dhe 2018, që lidhet me një transferim pronësie të një apartamenti në 2018 dhe një udhëtim të mundshëm në 2011.
Rød-Larsen ka kërkuar falje disa herë për lidhjen e tij me Epstein dhe në vitin 2020 dha dorëheqjen si drejtor ekzekutiv i IPI, një institut kërkimor për çështje ndërkombëtare.
