Ministri grek i Emigracionit, Makis Voridis, ka dhënë dorëheqjen pasditen e së premtes, së bashku me tre zëvendësministra, pas zbulimeve tronditëse për keqpërdorimin e fondeve bujqësore të Bashkimit Europian. Në qendër të këtij skandali është shpërndarja e paligjshme e subvencioneve për fermerët grekë, gjatë gjashtë viteve të fundit.
Vetëm pak ditë më parë, Komisioni Europian vendosi një gjobë prej 415 milionë eurosh ndaj Greqisë – shifër që mund të arrijë deri në 600 milionë – për keqmenaxhimin e fondeve të BE-së në sektorin e bujqësisë dhe për dështimin në zbatimin e kontrolleve të nevojshme.
Dosja hetimore, me mbi 3000 faqe, e mbërritur në parlament nga Prokuroria Europiane, përfshin edhe përgjime telefonike të siguruara nga Shërbimi Kombëtar i Inteligjencës, që dokumentojnë ndërhyrje politike, manipulim të aplikacioneve dhe favorizime sistematike në shpërndarjen e fondeve.
Regjistrimet zbulojnë një rrjet të gjerë politikanësh e zyrtarësh të lartë që dyshohet se kanë përdorur fondet si instrument për përfitime personale apo elektorale, ndërsa fermerët që kishin realisht nevojë mbeteshin jashtë skemave të ndihmës.
Në qendër të skandalit përmenden biseda komprometuese mes zyrtarëve aktualë dhe të mëparshëm të qeverisë, ku zbulohet edhe manipulimi i të dhënave, ndërhyrja në bazat e të dhënave dhe pagesa për ferma fiktive apo projekte që nuk kanë ekzistuar kurrë në terren.
Përballë presionit në rritje, kryeministri grek Kyriakos Mitsotakis ka pranuar dorëheqjen e Voridisit – i cili më parë ka mbajtur edhe postin e ministrit të Bujqësisë dhe kishte në mbikëqyrje agjencinë OPEKEPE, përgjegjëse për menaxhimin e fondeve.
Gjithashtu, janë pranuar dorëheqjet e zëvendësministrave Tasos Haxhivassiliou (i Jashtëm), Dionysis Stamenitis (Zhvillimi Rural) dhe Christos Boukoros (Qeverisja Dixhitale), si dhe e Sekretarit të Përgjithshëm për Zhvillimin Rural, Giorgos Stratakos.
Skandali po thellohet ndërsa hetimet pritet të zgjerojnë listën e të përfshirëve, përfshirë pagesat pa kontroll dhe fondet e përvetësuara për kullota apo aktivitete që nuk ekzistojnë në realitet.
