Fshf
Federata Shqiptare e Futbollit, në bashkëpunim me organet e qeverisë së futbollit europian dhe botëror ka organizuar herë pas herë seminare të ndryshme mbi Sistemin VAR ( Video Assistant Referee), që do të implementohet në kampionatin e Kategorisë Superiore duke nisur që nga ky edicion futbollistik.
Në Shqipëri, për të zhvilluar seminaret e radhës ka mbërritur drejtori teknik i IFAB (Bordi i Shoqatës Ndërkombëtare të Futbollit), David Elleray, njëkohësisht edhe anëtar i Komitetit të Arbitrave i UEFA-s, i cili ka zhvilluar ditën e sotme në ambientet e Shtëpisë së Futbollit, seminarin e parë me arbitrat dhe asistentët e Kategorisë Superiore, të cilët do të jenë në rolin e VAR-it (arbitrat) dhe AVAR-it (asistentët).
Fokusi kryesor i këtij seminari të parë ishte prekja e topit me dorë, ku përveç pjesës teorike, David Elleray kishte përgatitur edhe video të shkurtra të shkëputura nga ndeshjet e kompeticioneve europiane, për ta bërë sa më të kuptueshme pjesën e faulleve dhe kur duhet të ndërhyjë VAR-i.
Gjithashtu, Elleray shpjegoi në detaje edhe ndryshimet e reja të rregullave të lojës si dhe foli për protokollin e sistemit VAR në vendimmarrjet në fushë, duke përdorur edhe në këtë rast situata të shkëputura nga sfida të ndryshme, gjë që krijoi edhe interaktivitet në seminar, me arbitrat dhe asistentët që bëheshin gjatë gjithë kohës pjesë e seminarit.
Ditën e nesërme, David Elleray do të jetë sërish në Shtëpinë e Futbollit, ku do të organizojë një tjetër seminar me këtë grup, të cilët do të testojnë nga afër njohuritë e marra në pajisjen e VAR-it.
Ky nuk është seminari i parë që arbitrat dhe asistentët bëjnë për sistemin VAR me lektorë dhe drejtues të mëdhenj të botës europiane të futbollit, pasi deri tani janë organizuar disa të tillë.
