Siria po përballet me thatësirën më të rëndë në 36 vite, duke shkaktuar ulje drastike të prodhimit të grurit dhe rrezik të madh urie për mbi 14 milionë njerëz. Fermerët nuk po i përballojnë dot më kostot e mbjelljes dhe familjet mezi sigurojnë bukën e përditshme
Thatësira më e rëndë në 36 vitet e fundit ka shkaktuar një krizë të thellë ushqimore në Siri, duke ulur ndjeshëm prodhimin e grurit dhe duke vënë miliona njerëz në rrezik urie.
Fermerët në zona si Seqalbia, pranë Hamas, po përballen me të korrat më të dobëta ndonjëherë, ndërsa kostoja e bujqësisë është bërë e papërballueshme sipas tyre.
Një fermer me 40 dunumë tokë, thotë se këtë vit ka korrur më pak se një të tretën e rendimentit normal
“Ky vit ishte katastrofik,” shprehet ai, duke theksuar se nuk arrin të mbulojë as shpenzimet bazë për familjen.
Organizata e Kombeve të Bashkuara për Ushqimin dhe Bujqësin thotë se Siria përballet me një mungesë prej 2.73 milionë tonësh grurë – sasi që mjafton për të ushqyer rreth 16 milionë njerëz për një vit. Organizata paralajmëron se pasiguria ushqimore mund të arrijë nivele ekstreme deri në mesin e vitit 2026, nëse nuk ndërhyhet urgjentisht.
Ndërkohë, familjet në qytete vuajnë rritjen e çmimeve të produkteve bazë. Një qese bukë kushton sot 4,500 paund siriane, nga vetëm 500 paund një vit më parë. Kostoja e lartë e karburantit dhe mungesa e ujit kanë penguar ujitjen e tokave, duke rënduar më tej sektorin bujqësor, tashmë të dëmtuar nga lufta civile dhe kolapsi ekonomik.
Autoritetet kalimtare në Damask dhe agjencitë ndërkombëtare si ËFP po ofrojnë ndihmë urgjente përmes subvencioneve dhe pagesave direkte për fermerët, por ekspertët i cilësojnë këto si masa afatshkurtra.
Me reshjet e shiut të reduktuara me 70% dhe tokën ende të tharë, për shumë sirianë e vetmja shpresë mbetet një dimër me më shumë shi.
