Përshkallëzimi i tensioneve mes Izraelit dhe Iranit ka sjellë rritjen më të madhe ditore të çmimit të naftës që nga viti 2022. Çmimi i Brent Crude u rrit me 10 dollarë për fuçi në dy javët e para të qershorit, duke arritur në 78 dollarë për fuçi, si pasojë e frikës për ndërprerje të eksporteve të naftës nga Lindja e Mesme.
Edhe pse çmimet aktualisht janë stabilizuar rreth 75 dollarë për fuçi, analistët paralajmërojnë se nëse konflikti përshkallëzohet dhe ngushtica strategjike e Hormuzit mbyllet, çmimi mund të arrijë deri në 120 dollarë për fuçi. Ngushtica e Hormuzit është një arterie kyçe për tregtinë globale, pasi përmes saj kalon 20% e naftës dhe gazit natyror të konsumuar në botë.
Ekspertët vlerësojnë se ndërhyrja e Shteteve të Bashkuara dhe mbajtja e ngushticës së Hormuzit të hapur mund të ndihmojnë në stabilizimin e tregjeve dhe frenimin e rritjes së mëtejshme të çmimeve.
Ndërkohë, Mbretëria e Bashkuar dhe vendet europiane pritet të përballen me rritje të çmimeve të karburanteve dhe të faturave të energjisë në muajt në vijim si pasojë e situatës së tensionuar në rajon.
