Dje Kosova festoi 17-vjetorin e vet si shtet i pavarur dhe demokratik dhe në kuadër të kësaj do të ishte e vendit të theksonim “dashurinë” e Partizanit për të afruar sa më shumë lojtarë nga rajoni shqiptar më verior. Aktualisht te Partizani luajnë plot shtatë lojtarë me origjinë “dardane”.
Në mbrojtje përmendim Janjevën, Bytyçin dhe Domgjonin, teksa në mesfushë Ismaili, Mehmeti dhe Taipi janë elemente kryesore të ekipit. Në sulm luan Agim Zeka, që vjet u grumbullua edhe nga Kombëtarja e madhe.
Që nga ardhja e presidentit Demi, Partizani është përqendruar te tregu i Kosovës, ndikuar edhe nga profesionalizmi i treguar nga këta djem. Duhet thënë se lojtarët e lartpërmendur përbëjnë bazën e ekipit të Partizanit dhe pikat ku ekipi mbështetet më së shumti. Një pjesë e këtyre futbollistëve mund të shiten dhe të sjellin të ardhura të rëndësishme në klub në të ardhmen.
