Shqipëria është rreshtuar zyrtarisht në krah të Kosovës, për dialogun me Serbinë, duke mos qëndruar në një linjë me deklaratën e Josep Borrell. Përfaqësuesi i Bashkimit Evropian u kishte kërkuar vendeve anëtare që të mbështesnin qëndrimin e tij për Prishtinën dhe Beogradin, pas takimit në Bruksel.
Report TV bën me dije vendi ynë nuk ka qenë dakord me deklaratën e Borrel që Serbia dhe Kosova të nisin pa vonesa dialogun për marrëveshjen që kanë pranuar në Bruksel e Ohër.
Ky vendim nuk ka lidhje sulmin që terroristët serbë përgatitën në Manastirin e Banjskës, por me takimin që Albin Kurti dhe Aleksandër Vuçiç zhvilluan më datë 14 shtator në Bruksel. Megjithatë, ngjarja e së shtunës ka pasur ndikimin e vetë në vendim.
Kjo është hera e parë që Shqipëria del kundër një deklarate të Bashkimit Evropian, duke theksuar se situata aktuale nuk ka lidhje me qëndrimet në deklaratën e 19 shtatorit të Josep Borrell, duke bërë fajtore Serbinë.
Dje, kryeministri Edi Rama ka deklaruar se Beogradi zyrtar është përgjegjës për ngjarjet në veri të Kosovës dhe ka kërkuar që Bashkimi Evropian dhe Amerika të marrë masa të menjëhershme.
Marrëveshja apo deklarata e 19 shtatorit që Shqipëria refuzoi të qëndronte në një linjë me Bashkimin Evropian, bën fjalë për dialogun e ndërmjetësuar mes Serbisë dhe Kosovës, që të dy vendet të nisin pa vonesa zbatimin e çështjeve të dakordësuara.
Kjo deklaratë është kundërshtuar dhe nga kryeministri Albin Kurti, sepse Kosovës i kërkohet të formojë pa vonesa Asociacionin e Komunave me shumicë serbe, por nga ana tjetër nuk kushtëzon Serbinë mbi kërkesën e Prishtinës zyrtare, për ngjohjen e Pavarësisë.
