Kombëtarja shqiptare e Minifutbollit ka debutuar sot për herë të parë në fazën finale të një Kampionati Botëror. Kuqezinjtë kanë luajtur sot përballë Sllovakisë, në një ndeshje ku janë mposhtur me shifrat 2-0.
Eksperienca në kompeticione të tilla bëri diferencën në këtë sfidë, pasi sllovakët goditën që në startin e sfidës dhe më pas administruan mirë momentet kyç të takimit përballë kuqezinjve, të cilëve nuk u mungoi dëshira për të kërkuar golin e barazimit.
Goli i shënuar në pjesën e dytë ishte ai që vulosi fatin e ndeshjes pasi ritmi i saj ra dhe vetëm në fund Shqipëria tentoi përsëri të shënonte një gol që të ndryshonte fatin e sfidës, por pa sukses.
Ndeshja e radhës e kuqezinjve është të dielën në orën 17:15 ndaj Francës, ndërsa ndeshja e fundit në grup është ajo ndaj Anglisë të martën po në orën 17:15.
SLLOVAKI-SHQIPËRI 2-0
7′ Juhas, 35′ Belish
NGJARJET KRYESORE
50’ Mbyllet ndeshja me fitoren 2-0 të Sllovakisë.
47’ Sllovakët bëjnë ndryshime të vazhdueshme të formacionit për të mbajtur lojtarët të freskët në minutat ku është shtuar trysnia e kuqezinjve.
44’ Përsëri Mersini tenton të gjuajë direkt në portë nga një top i kthyer nga mbrojtja, sfera këtë herë shkon ngadalë në duart e portierit.
44’ Mersini provon nga distanca, është përsëri portieri sllovak që i mohon golin kuqezinjve.
43’ Biba pason për A. Branicën në zonë por devijimi i këtij të fundi nuk gjen portën sllovake.
42’ Ademi nga e majta lëshon një gjuajtje të fortë, por gjen përgjigjen e portierit sllovak.
39’ Një dalje e mirë e Xhaferrit i mohon golin e radhës sllovakëve, që ishin në një kundërsulm në epërsi numerike.
35’ Mbrojtja kuqezi nuk është e vendosur mirë dhe Belish e ka të lehtë të mposhtë Xhaferrin duke i kaluar topin mes këmbëve. 2-0 për Sllovakinë.
33’ Blazej tenton nga një goditje dënimi, sfera shkon jashtë pas një devijimi.
31’ Jurkemik tenton nga gjysmëfusha me një gjuajtje të fortë që për fat përfundon jashtë.
29’ Janë sllovakët të cilët në këto minuta po kontrollojnë lojën duke synuar të dyfishojnë shifrat.
26’ Nga goditja e këndit vjen një tjetër gjuajtje drejt portës kuqezi që ndalet nga Xhaferri.
26’ Pjesa e dytë nis me një rrezik nga ana e miqve të cilët i afrohen zonës, por K. Branica devijon sferën në këndore.
25’ Mbyllet pjesa e parë me avantazhin e Sllovakisë 1-0.
25’ Mersini merr topin pranë zonës kundërshtare dhe gjuan, por sfera ndalet në duart e portierit.
24’ Antol lëshon në gjuajtje të fortë nga larg, topi ndalet nga shtylla e portës së Xhaferrit dhe përfundon jashtë.
20’ Kuqezinjtë shfaqen më rrezikshëm me Branicën e Hajdarin, por asnjë prej tyre nuk ia del të çajë bllokadën e mbrojtjes sllovake.
17’ K. Branica provon nga distanca në pozicion ballor, sfera përfundon në duart e portierit sllovak.
15’ Provon edhe Blazej nga jashtë, sfera kalon mbi traversën e portës së Shqipërisë.
14’ Belis nga jashtë zonës gjuan fort, për Xhaferri përsëri është i pakalueshëm.
11’ K. Branica shfaqet nga e djathta dhe gjuan, pro gjen vetëm rrjetën e jashtme të katërkëndorit të sllovakëve.
10’ Një tjetër gjuajtje nga e majta sjell reagimin e Xhaferrit i cili devijon sferën dhe shpëton portën nga goli i dytë.
7’ Një gjuajtje e fortë sjell reagimin e Xhaferrit por vjen pastaj një futbollist i sllovakëve që kthen sferën në rrjetë. 1-0 për sllovakët.
5′ Goditje qendrore e sllovakëve, Xhaferri pret në pozicon.
4’ Një mundësi e mirë për Shqipërinë me një pasim për Ademin në të djathtë, por topi shkon në anësore.
1’ Nis dueli me shkelmimin nga qendra.
