Zëvendësministrja e Mirëqenies Sociale dhe Rinisë, Vjollca Braho, së bashku me ministrin e Punës dhe Sigurimeve Shoqërore të Luksemburgut, Romain Schneider, firmosën marrëveshjen administrative midis qeverisë shqiptare dhe qeverisë së Dukatit të Madh të Luksemburgut.
Sipas një njoftimi për shtyp të MMSR-së, të shtunën, nënshkrimi i kësaj marrëveshje është një lajm i mirë për më shumë se 1300 shqiptarë, që jetojnë dhe punojnë në Luksemburg dhe anasjelltas, të cilët do të kenë mundësinë të përfitojnë nga marrëveshja për njohjen e periudhave kontributive mes Shqipërisë dhe Luksemburgut.
Falë kësaj marrëveshje bëhet e mundur që shtetasve të të dy vendeve t’u njihen periudhat e kontributit për efekt të vjetërsisë në punë dhe të sigurimeve shëndëtësore, shkruan ATSH.
Në fjalën e saj, zv. ministrja Braho, u shpreh se pavarësisht vështirësive do të vazhdojmë punën për nënshkrimin e marrëveshjeve të tilla me të gjithë vendet ku jetojnë dhe punojnë shqiptarët, në mënyrë që, askush të mos humbë asnjë qindarkë nga paratë e derdhura për efekt pensioni.
