Në Madagaskar, janë zhvilluar protesta masive gjatë këtyre ditëve, duke shkaktuar pasoja tragjike, me 22 të vdekur dhe 100 të plagosur. Protestat u nisën nga rinia, pas ndërprerjes së furnizimeve me ujë dhe energji elektrike. Presidenti i vendit reagoi, duke shpallur një vendim për shpërndarjen e qeverisë dhe kërkoi ndjesë për mosperformancën e disa anëtarëve të qeverisë.
BBC raporton se protesta e quajtur “Gjenerata Z” ka sjellë në rrugë mijëra të rinj, që janë shprehur me sloganin “Ne duam të jetojmë, jo të mbijetojmë”. Komisioneri i OKB-së për të drejtat e njeriut dënoi përdorimin e tepruar të forcës nga forcat e sigurisë, duke theksuar se 22 persona humbën jetën dhe 100 të tjerë u plagosën. Megjithatë, Ministria e Jashtme e Madagaskarit ka kundërshtuar këtë raport, duke thënë se shifrat janë të pasakta dhe të bazuara në thashetheme.
Protestat filluan në kryeqytetin Antananarivo dhe u përhapën shpejt në tetë qytete të tjera. OKB-ja ka raportuar se disa nga të vdekurit ishin protestues, por gjithashtu ka pasur viktima të tjerë që u vranë nga forcat e sigurisë apo nga individë dhe grupe të përfshira në dhunë dhe plaçkitje të mëtejshme. Javën e kaluar, presidenti shkarkoi ministrin e energjisë për shkak të dështimit të tij në menaxhimin e krizës, por demonstruesit kërkuan dorëheqjen edhe të presidentit dhe të gjithë qeverisë.
Ky është një nga momentet më të vështira për presidentin e Madagaskarit, që nga rizgjedhja e tij në vitin 2023, dhe përballet me një krizë të rëndë, që pasqyron tensionet e thella sociale në vend, të ngjashme me ato të periudhave të mëparshme, si në vitin 2009, kur protestat çuan në dorëheqjen e ish-presidentit Marc Ravalomanana.
