Komisioni Qendror i Zgjedhjeve (KQZ) ka njoftuar se votuesit shqiptarë në Greqi janë informuar përmes email-it ose numrit të telefonit nga kompania postare DHL mbi detajet e dorëzimit të zarfeve të votimit për zgjedhjet e 11 majit 2025.
Sipas KQZ-së, postieri do të dorëzojë zarfin në adresën e deklaruar, por nëse zgjedhësi nuk ndodhet në banesë, zarfi do të depozitohet në një nga pikat më të afërta të DHL-së. Pavarësisht këtij mekanizmi, situata në Greqi është cilësuar nga kryekomisioneri Ilirjan Celibashi si më problematikja, pasi nga 68,380 zarfe të dërguara, janë kthyer vetëm 2,400 vota deri tani.
Për të përmirësuar procesin, shpërndarja do të vijojë edhe gjatë fundjavës, me orare të zgjatura pune në pikat e DHL, konkretisht:
Në Athinë (26 prill, 09:00 – 15:00):
Rruga Patision
Rruga Filellinon
Pire
Rruga Alimos
Glifada
Nea Smyrni
Në pjesën tjetër të Greqisë (po ashtu 09:00 – 15:00):
Selanik (Rr. Vasilissis Olgas dhe Rr. Polytechniou)
Larisa
Patra (Rr. Agiou Andrea)
Iraklio
Hania
Në rast se një votues ka marrë njoftimin, por nuk ka marrë ende zarfin, mund të kontaktojë zyrën qendrore të DHL në Greqi në +30 210 989 0000 duke përdorur numrin e identifikimit të zarfit (αριθμός φορτωτικής).
Zarfet mund të dorëzohen mbrapsht përmes dy mënyrave:
Duke kërkuar tërheqjen nga DHL në banesë
Duke e dorëzuar vetë në pikën më të afërt të DHL
Ndërkohë, PS dhe PD kanë ngritur shqetësime për shkelje të rregullave të shpërndarjes. Sipas tyre, zarfet nuk po dorëzohen personalisht te votuesi, por shpesh po lihen në kutitë postare, tek komshinjtë, apo pa kërkuar mjet identifikimi. Në disa raste është raportuar se nuk respektohet procedura e dorëzimit dorazi dhe verifikimit të identitetit.
Pas ankesave të qytetarëve dhe partive, AKEP i ka kërkuar KQZ-së kopjen e kontratës me DHL-në për të shqyrtuar nëse kompania ka shkelur kushtet e marrëveshjes.
