Sot, më 4 korrik 2025, Shtetet e Bashkuara të Amerikës kremtojnë 249-vjetorin e Pavarësisë, një nga ditët më të rëndësishme historike për kombin amerikan.
Kjo datë përkujton nënshkrimin e Deklaratës së Pavarësisë më 4 korrik 1776, kur delegatët e 13 kolonive britanike në Amerikën e Veriut shpallën shkëputjen nga sundimi britanik, duke i hapur rrugë krijimit të një shteti të pavarur.
Përpara kësaj date, kolonitë ishin të detyruara të respektonin ligjet britanike dhe të paguanin detyrime të larta doganore, gjë që solli pakënaqësi të mëdha mes popullatës dhe kontribuoi në shpërthimin e Revolucionit Amerikan.
Thomas Jefferson, një nga figurat kryesore të pavarësisë, së bashku me Benjamin Franklin dhe personalitete të tjera historike, nënshkruan aktin që shpalli kolonitë si shtete të lira dhe të pavarura, duke i dhënë fund kontrollit të kurorës britanike.
Për nder të kësaj dite, në të gjithë SHBA organizohen parada madhështore, koncerte, aktivitete familjare dhe festa në çdo qytet, që kulmojnë në mbrëmje me spektaklin tradicional të fishekzjarrëve. Kjo ditë shërben si simbol i lirisë, bashkimit dhe krenarisë kombëtare për të gjithë qytetarët amerikanë.
