Për bastvënësit nuk ka asnjë dyshim, posti i papës së ardhshëm do të kontestohet mes kardinalit italian Pietro Parolin dhe atij filipinas Luis Antonio Tagle.
Në fakt, me vdekjen e Françeskut ka nisur në mënyrë të pashmangshme edhe lotaria, që për herë të parë ka përfshirë edhe inteligjencën artificiale, parashikimi i së cilës për momentin është i ngjashëm me atë njerëzor.
Dhe, me afrimin e datës së Konklavës, agjencitë e basteve janë vënë në punë për të promovuar kuotat më të mundshme dhe për të bërë përditësimet e minutës së fundit në rast dezertimesh apo të papriturash.
Sipas kuotave të agjencive britanike, të konsideruara si më aktivet dhe fantazistet në frontin e basteve ekstra-sportive, Parolin gëzon 35 për qind të mundësive për t’u ngjitur në fronin papnor, ndërsa filipinasi Tagle 25 për qind.
Bëhet fjalë gjithësesi për vlerësime që variojnë nga momenti në moment. Në vendet e para të klasifikimit janë edhe hungarezi Peter Erdo, portugezi Jose Tolentino, dy italianë të tjerë dhe tre kardinalë afrikanë.
Gjithashtu janë me mijëra përdoruesit e regjistruar në platformën ku ekziston mundësia jo vetëm për të prezantuar “formacionin” përkatës të kandidatëve për papë, por edhe për të vënë bast për opsione të tjera, si cili emër do të zgjidhet, cila do të jetë fjala e tij e parë gjatë prezantimit, apo në cilën ditë të javës ati i ri i shenjtë do të zgjidhet.
