Ndeshja mes Anglisë dhe Shqipërisë këtë të premte do të sjellë një përballje interesante mes trajnerëve Tomas Tuhel dhe Silvinjo. Kjo nuk është hera e parë që dy trajnerët përballen me njëri-tjetrin në pankinë, pasi ata janë ndeshur më parë gjatë sezonit 2019.
Përballja e vetme mes tyre ndodhi në shtator të vitit 2019, kur Tuhel drejtonte PSG-në dhe Silvinjo ishte në krye të Olimpik Lionit. Në atë ndeshje të Ligës së Parë Franceze, PSG-ja arriti të triumfojë falë një goli të shënuar në minutat e fundit nga Nejmar. Braziliani zgjidhi ndeshjen me një lëvizje mjeshtërore, duke thyer mbrojtjen e fortë të Lionit.
Vetëm pak javë pas asaj sfide, Silvinjo u shkarkua nga drejtimi i Olimpik Lionit, ndërsa Tuhel e udhëhoqi PSG-në drejt titullit kampion në Francë dhe deri në finalen e Ligës së Kampioneve.
Këtë herë, në një skenë krejt tjetër, dy trajnerët do të përballen sërish, por në një ndeshje mes Anglisë dhe Shqipërisë, ku Silvinjo do të kërkojë të surprizojë Tuhelin në një sfidë të nivelit kombëtar.
