Rebelët sirianë deklaruan rënien e presidentit Bashar al-Assad, më pak se dy javë pas një ofensive të rrufeshme që i dha fund sundimit prej dekadash të familjes së tij. Ndërsa sirianët u zgjuan në një vend të ndryshuar, flamujt rebelë kishin zëvendësuar posterat e Assadit, që më parë ngriheshin pothuajse në çdo cep.
Zhvillimi mund të çojë në një ndryshim të rëndësishëm – një flamur të ri zyrtar për vendin e Lindjes së Mesme dhe që numëron mbi 20 milionë banorë.
Flamuri aktual sirian
Flamuri aktual sirian ka qenë në përdorim që nga viti 1980 dhe është një shenjë e unitetit arab. Ngjyrat në flamur nënkuptojnë sa vijon:
E kuqja përfaqëson gjakun e derdhur në revolucionin për lirinë e sirianëve
• E bardha tregon një të ardhme paqësore
• Yjet e gjelbër në mes përfaqësojnë Sirinë dhe Egjiptin – dy shtetet themeluese të Republikës së Bashkuar Arabe
• E Zeza është për shtypjen e vuajtur nga arabët
Ky flamur u miratua për herë të parë në vitin 1958 kur vendi ishte bërë i pavarur nga ndikimi evropian dhe vendosi të formonte Republikën e Bashkuar Arabe me Egjiptin. Vendi ndryshoi flamurin e tij edhe tre herë midis 1961 dhe 1980 përpara se të vendosej në modelin aktual. Megjithatë, me rrëzimin e Bashar al-Assad-it, kjo mund të ndryshojë së shpejti.
Flamuri i rebelëve sirianë
Të dielën, ndërsa rebelët njoftuan në televizionin shtetëror të Sirisë se dinastia familjare 50-vjeçare e Assad ishte eliminuar, flamujt e opozitës me ngjyrat jeshile-bardhë-zi-kuq u panë në të gjithë vendin. Festimet bënë jehonë në Gjermani, Turqi dhe Greqi, ku turma të gëzuara prej mijëra vetësh valëvitën flamujt e opozitës siriane.
PreviousNext
Mbështetësit e rebelëve hynë në ambasadën siriane në Athinë duke ngritur flamurin e opozitës siriane nga çatia. Policia ndaloi katër persona, megjithatë, sipas një raporti të Reuters, e lanë flamurin të valëvitej.
Flamuri rebel nuk është shumë i ndryshëm nga flamuri aktual sirian. Ka ngjyrë të gjelbër në krye, të bardhë në mes dhe të zezë në fund të flamurit me tre yje të kuq në mes.
Ky flamur është një version i modifikuar i flamurit të pavarësisë i përdorur për herë të parë në vitin 1932 kur Siria fitoi pavarësinë nga Franca. Opozita siriane favorizoi flamurin për të përfaqësuar pavarësinë nga qeveria e Assadit.
Bashar al-Assad dhe familja e tij tashmë janë në Moskë, teksa Kremlini konfirmoi se ishte vetë presidenti rus Vladimir Putin që i garantoi “azil për arsye humanitare” familjes së ish-presidentit sirian.
