Sulmuesi egjiptian, Mohamed Salah ka nënshkruar kontratë të re dyvjeçare me Liverpoolin.
Marrëveshja e tij e mëparshme ishte planifikuar të mbaronte në verë dhe kishte dyshime se ai do të qëndronte me Reds pas komenteve nga 32-vjeçari gjatë sezonit si dhe spekulimeve që e lidhnin atë me një lëvizje në Arabinë Saudite, shkruan BBC.
Megjithatë, ai tani do të ketë mundësinë të shtojë 243 golat e tij dhe 109 asistime për Liverpool në 394 paraqitje.
“Sigurisht që jam shumë i emocionuar – ne kemi një ekip të madh tani”, tha Salah.
“Më parë kishim edhe një skuadër të madhe, por unë firmosa sepse mendoj se kemi një shans për të fituar trofe të tjerë dhe për të shijuar futbollin tim. Kam luajtur tetë vjet këtu, shpresoj se do të jetë 10. Po e shijoj jetën time këtu, duke shijuar futbollin tim. Kam kaluar vitet më të mira të karrierës sime këtu”, u shpreh egjiptiani.
Salah ka shënuar 32 gola në të gjitha kompeticionet këtë sezon, duke përfshirë 27 në Premier League, ndërsa Reds ndjekin titullin e 20-të të ligës. Liverpool është 11 pikë përpara Arsenalit të vendit të dytë me shtatë ndeshje të mbetura.
Salah, i cili iu bashkua Liverpoolit nga Roma në vitin 2017, ka fituar Ligën e Kampionëve, Premier Ligën, FA Cup, Kupën e Ligës dhe Kupën e Botës për Klube FIFA me Reds.
