Bashkimi Evropian i bëri thirrje sot Rusisë që të përmbahet nga kërcënimet bërthamore dhe të shmangë veprimet që do të shkaktonin një garë të re armatimesh.
I pyetur për të komentuar mbi urdhrin e Presidentit rus Vladimir Putin për të rifilluar testet bërthamore, zëdhënësi i Komisionit Evropian për politikën e jashtme, Anwar El Anouani, u përgjigj se ishte një deklaratë që shkonte në drejtimin e gabuar dhe theksoi se “Rusia duhet të përmbahet nga hapat që mund të ndikojnë negativisht në kufizimin e përdorimit të armëve bërthamore”.
Zëdhënësi i Komisionit përsëriti:
“Rusia duhet t’u përmbahet detyrimeve dhe angazhimeve të saj ndërkombëtare, përfshirë Traktatin për Mospërhapjen e Armëve Bërthamore. Së bashku me pesë shtetet me armë bërthamore, Rusia është pajtuar dhe është riangazhuar ndaj parimit se një luftë bërthamore nuk mund të fitohet dhe nuk duhet të zhvillohet kurrë”.
“BE-ja i kërkon Rusisë të përmbahet nga kërcënimet bërthamore dhe të gjitha palëve të përfshira të shmangin veprimet që mund të shkaktojnë një garë të re armatimesh, pasi një sjellje e tillë minon stabilitetin global dhe progresin e arritur me mund në reduktimin e armëve bërthamore që nga fundi i Luftës së Ftohtë”, përfundoi zëdhënësi i Komisionit.
