Bardhi Quku, kryeredaktor i Tirana Today/Prej kohësh kemi hyrë në epokën e Gazetarisë 2.0 dhe 3.0, të asaj që zhvillohet respektivisht në ueb dhe në rrjetet sociale.
Si kurrë ndonjëherë më parë, ai që shkruan, në këtë rast gazetari, po i trembet kontrollit të atij që e lexon.
Për këtë arsye, kur sheh rritjen e këtij kontrolli dhe kur qytetari është bërë pjesë integrale e informacionit, deontologjia e vetë profesionit të Gazetarisë, rrjedhimisht të kërkon të rrisësh nivelin e përgjegjësisë.
Sot jemi dëshimtarë se si transmetimi profesional i informacionit dhe ngjarjeve në median online është tkurrur në një titull tërheqës marketingu për të shitur produktin, që në fakt është vetëm formë pa asnjë përmbajtje.
Tirana Today kërkon t’i ikë këtij tundimi, që ndoshta është fitimprurës në fillim, por rrënues në një periudhë afatgjatë, që ndoshta është interesante për disa njerëz, por aspak në interes të opinionit publik.
Është e kuptueshme që të njohësh të vërtetën në epokën e mbingarkesës së informacionit mbetet një nga sfidat më të mëdha për cilëndo media. Të dalësh mbi zhurmën që prodhon retorika politike, mbi lajmet e rreme, të tejkalosh fiksimin e shitjes së lajmit të fundit, pa e konfirmuar më parë atë, është rruga që shumë pak media e shkelin.
Tirana Today kërkon të shkelë në këtë rrugë.
Tirana Today do të jetë zëri i atyre që nuk dëgjohen dhe kritik me cilëndo ngjyrë të pushtetit.
Përveç informacionit politik, ekonomik, social dhe sportiv, si pjesë bazike e çdo medie, Tirana Today, do të jetë një hapësirë e analizave, opinionit dhe transmetimit të mendimit të lirë e të vërtetë, duke i rezistuar formave të ndryshme të censurës.
Pavarësisht se bart emrin Tirana Today, informacioni nuk do të jetë i përqendruar vetëm mbi atë që ndodh në kryeqendrën e Shqipërisë, por do t’i kushtojë rëndësi edhe ngjarjeve politike, ekonomike dhe sociale në trevat shqiptare dhe atyre me ndikim global.
Për t’ju informuar mbi të gjitha këto çështje, ftesa jonë vjen në mënyrë të natyrshme për cilindo prej jush: Lexo, bëj diferencën!
Nuk është një thirrje moraliste në formën e urdhëresës për të lexuar. Por, një ftesë e sinqertë e atij që shkruan për atë që e lexon.
Ju do të jeni gjykuesit më të rreptë të informacionit që transmetojmë, mbi të cilin do të bëni edhe diferencën.
