Dy ditë pas shpërthimit, autoritetet iraniane ende nuk kanë dhënë një shpjegim të qartë për shkakun e tragjedisë. Numri i viktimave nga shpërthimi në portin e Shahid Rajaee, jashtë Bandar Abbas në Iran është rritur në 40, ndërsa më shumë se 1 mijë të tjerë janë plagosur, raporton Corriere della Sera.
Përfaqësues të qeverisë iraniane kanë hedhur poshtë këto akuza, duke sulmuar mediat ndërkombëtare për përhapjen e “informacioneve të pasakta” dhe duke theksuar se shkaku i shpërthimit do të publikohet vetëm pas hetimeve të plota. Autoritetet kanë kërcënuar gjithashtu me ndjekje ligjore ata që përhapin lajme të rreme. Sipas mediave shtetërore, shpërthimi ka filluar nga një kontejner. Administrata doganore ka sugjeruar se shpërthimi ka ardhur si rezultat i një “stoku mallrash të rrezikshme dhe materialeve kimike të magazinuara në zonën portuale”. Raportimet e mediave ndërkombëtare kanë shtuar dyshimet, duke lidhur shpërthimin me mundësinë e përfshirjes së perkloratit të natriumit, një substancë e përdorur në prodhimin e karburantit për raketa balistike.
Zëdhënësi i ministrisë së Mbrojtjes, Reza Talaeinik, tha për Iran News se “nuk ka pasur dhe nuk ka ngarkesa të importuara apo eksportuara për përdorim ushtarak në port. Mediet e huaja janë në linjë me operacionet psikologjike të armikut. Shkaqet e shpërthimit do të bëhen të ditura pas hetimeve nga agjencitë përkatëse”. Masoud Pezeshkian, presidenti “reformist” i Iranit, ka mbikëqyrur operacionet e shpëtimit dhe ka vizituar të mbijetuarit, duke shprehur solidaritetin e tij me familjet e prekur nga tragjedia.
Kur u pyet nga gazetarët për arsyen e mbajtjes së 140,000 kontejnerëve në port për muaj të tërë, Pezeshkian tha se duhet të shmangim mbajtjen e një numri kaq të madh kontejnerësh të palëvizur dhe se do të bëhen studime krahasuese me vendet e tjera të zhvilluara për të parandaluar incidente të ngjashme. Edhe Narges Mohammadi, fituese e Çmimit Nobel për Paqen, ka komentuar situatën, duke akuzuar regjimin iranian për papërgjegjshmëri dhe përqendrimin vetëm në mbijetesën e tij, duke injoruar jetët e qytetarëve të tij. Pas shpërthimit, dy avionë nga Moska mbërritën për të ndihmuar me operacionet e shpëtimit, ndërsa Irani shpalli të hënën ditë zie kombëtare.
