Një ngjarje e rëndë ka tronditur Indinë dhe komunitetin ndërkombëtar: një avion pasagjerësh i tipit Boeing 787 i kompanisë Air India është rrëzuar të enjten në një zonë të banuar të qytetit Ahmedabad, duke shkaktuar vdekjen e më shumë se 260 personave.
Sipas autoriteteve indiane, në bord ndodheshin 242 pasagjerë, ndërsa vetëm një person ka mbijetuar.
Përveç viktimave në avion, të paktën 24 persona kanë humbur jetën në tokë, pasi avioni u përplas mbi një konvikt ku jetonin studentë mjekësie dhe familjarë të tyre. Goditja u përqendrua veçanërisht mbi mensën ku ndodheshin shumë prej tyre në momentin e aksidentit.
Kutitë e zeza dhe hetimi ndërkombëtar
Sipas Hindustan Times, një nga dy “kutitë e zeza” të avionit është gjetur, ndërsa autoritetet indiane të aviacionit kanë nisur një hetim zyrtar ndërkombëtar, në bashkëpunim me ekspertë nga Britania, Shtetet e Bashkuara dhe përfaqësues të kompanisë Boeing. Fluturimi kishte si destinacion aeroportin Gatwick në Londër.
Ndërkohë, sipas NDTV, qeveria indiane po shqyrton pezullimin e të gjithë flotës Boeing 787 të Air India-s, pas tragjedisë që shkaktoi humbje të mëdha njerëzore.
Dëshmitarë: Avioni humbi lartësi menjëherë pas ngritjes
Avioni u ngrit në orën 13:39 me orën lokale dhe vetëm pak minuta më pas lëshoi sinjal emergjence.
Video të publikuara në rrjetet sociale tregojnë avionin duke humbur shpejt lartësi dhe më pas duke u përplasur mbi ndërtesa përpara se të shpërthente në flakë.
Shefi i policisë, Kannan Desai, konfirmoi se janë gjetur 265 trupa, duke përfshirë viktimat në tokë dhe pasagjerët.
