Kandidati i Partisë Demokratike për Bashkinë e Tiranës, Roland Bejko, ka zhvilluar një sërë takimesh me demokratët e Vaqarrit, në degën 15.
Përmes një postimi në “ Facebook”, Bejko ritheksoi dhe njëherë se beteja e tyre është me të majtët dhe jo me pjesën tjetër të Partisë Demokratike.
Sipas Bejkos, ish-kryeministri Sali Berisha, i cili përfaqëson pjesën tjetër të Partisë Demokratike, është duke fuqizuar kryetarin e Partisë së Lirisë, Ilir Meta për interesa personale.
“Vijojmë takimet me demokratët e Vaqarrit, dega 15 në Tiranë. Gjatë mbledhjes, ju thashë se: në këto zgjedhje, përballja jonë është me të majtën, jo me atë pjesë, që ka qenë me ne, ndërsa tani për interesa personale po fuqizon Ilir Metën. Ne aleancën e kemi me njerëzit e thjesht të Tiranës, që po përballen me vështirësitë që vijnë si nga bashkia por edhe kryeministri.
Nga takimi banorët shprehën shqetësimin për problematikat që lidhen me infrastrukturën, që ju dëmton biznesin dhe jetesën e përditshme. Unë ju premtova se çdo shqetësimin i tyre, do të përfshihet në programin e skuadrës tonë që do të publikohet këto ditë, dhe do ofrojë zgjidhje për shumë probleme të Tiranës”, shkruan Bejko në Facebook.
