Violinisti shqiptar me famë botërore rikthehet sërish në Shqipëri. Këtë radhë vjen për të mbajtur një show gjigant më 23 shtator. Ai do të zbresë në sheshin “Skënderbej” me eventin artistik të titulluar, “show outdoor”, “Shkëlzen Doli – Albanian Soul”.
Ai do të jetë ideatori dhe udhëheqësi artistik i këtij projekti muzikor. Ky eveniment artistik do të transmetohet nga një numër televizionesh në Evropë, Azi dhe SHBA.
Nën udhëheqjen artistike të Dolit do të ngjiten në skenë rreth 70 instrumentistë virtuozë nga Shqipëria, Kosova dhe Maqedonia, shkruan Top Channel. Në këtë koncert do të marrin pjesë të ftuar specialë, artistë të mëdhenj, emrat e të cilëve do të zbulohen në shtator.
Ky eveniment do të mirëpresë në sheshin “Skënderbej” artdashës nga gjithë trojet shqipfolëse, diaspora, por dhe shumë turistë të huaj. Bazë e këtij evenimenti do të jetë muzika shqiptare, por në program do të ketë dhe pjesë të zgjedhura nga muzika klasike ndërkombëtare.
