Instituti Kombëtar i Trashëgimisë Kulturore njoftoi se Ura e Niçës ka shpëtuar nga rreziku i shembjes, pas restaurimit të plotë të saj.
IKTK-ja e vlerëson Urën e Niçës si një ndër dëshmitë më të rëndësishme të trashëgimisë sonë inxhinierike dhe rrugore. Kjo urë, Monument Kulture i Kategorisë I, rrezikonte shembjen për shkak të dëmtimeve të rënda në strukturë.
Në vitin 2023, ekipi i Drejtorisë Rajonale të Trashëgimisë Kulturore Korçë ndërhyri me masa emergjente për stabilizimin dhe pajantimin e urës, duke shmangur dëmtimet e mëtejshme.
Falë fondeve të Ministrisë së Turizmit, Kulturës dhe Sportit gjatë vitit 2025, u realizua restaurimi i plotë i urës, i cili nxori në pah vlerat kulturore dhe e nxori përfundimisht jashtë rrezikut të shembjes.
Ura e Niçës ndodhet fare pranë fshatit me të njëjtin emër në krahinën e Gorës. Ajo është ndërtuar prej guri dhe përbëhet nga një hark i vetëm.
Ura i përket shek. XVIII, por është ndërtuar mbi një rrugë shumë më të vjetër se ajo, që është një degëzim i rrugës Egnatia dhe lidhte Përrenjasin me Gurin e Kamjes–Niçën–Llëngën etj. Vetë ura lidh dy brigjet e një përroi dhe ka përmasa relativisht të vogla ku gjatësia nuk i kalon 6 metra ndërsa lartësia është rreth 3 metra.
