Sivaspori, skuadra turke ku aktivizohet sulmuesi shqiptar Rei Manaj, ndodhet në një situatë të rënduar, duke u renditur në vendin e 17-të me 35 pikë pas 34 javësh, vetëm dy javë para përfundimit të kampionatit, dhe në prag të rënies nga elita e futbollit turk.
Në një zhvillim të papritur dhe të cilësuar si absurd nga mediat vendase, Manaj është përjashtuar nga skuadra nga bordi drejtues i klubit. Vendimi vjen pas kritikave të trajnerit Rıza Çalımbai ndaj performancës së tij në barazimin 0-0 ndaj Bodrum KF, ndonëse Manaj mbetet lojtari më efektiv i ekipit këtë sezon.
Sulmuesi shqiptar ka zhvilluar 27 ndeshje, ka shënuar 12 gola dhe ka dhënë 5 asistime, duke qenë golashënuesi më i mirë i skuadrës së Sivasporit.
Skuadra bardhekuqe do të luajë sfidën e radhës në transfertë ndaj Samsunsporit, që mban vendin e katërt, ditën e diel, ndërsa mbetet për t’u parë nëse përjashtimi i Manajt do të ndikojë në përpjekjet e fundit për të shmangur rënien nga kategoria.
