Kryeministri i Shqipërisë, Edi Rama, sot nga asambleja e PS-së e ka ftuar publikisht LSI-në për të hyrë bashkë në zgjedhjet parlamentare te 18-qershorit. Sipas Kryeministrit Rama, kjo marrëveshje me LSI-në është e domosdoshme dhe i shërben vendit.
Duke folur para anëtarëve të këtij forumi, ai tha, megjithatë, se sulmet e disa eksponentëve të LSI-së për disa reforma, si: ajo e Arsimit të Lartë, janë si kofini para të vjelit të fushatës elektorale.
“Partneritetin me LSI ka ndër ne që e përjetojnë si të ezauruar, ka të tjerë që e përjetojnë si mëkat. Arsyet e këtyre përjetimeve janë nga më të ndryshmet. Herë janë të drejta dhe herë jo, herë janë të justifikuar dhe herë jo. Herë janë të ekzagjeruara dhe herë të sajuara. Jashtë nesh i bien më shkurt, e quajnë një marrëveshje për pushtet. Sa për mua, cilësia e këtij partneriteti nuk matet me gjërat që nuk shkojnë në bashkëqeverisjen e sotme, as në helmin që hedhin hera- herës aleatët tanë të vegjël, matet me sa shumë progres tregojnë faktet dhe shifrat e çdo sektori”, tha Rama.
Rama shtoi se “bashkë me peshën më të madhe të përgjegjësisë për fatet e vendit, për vetë fazën ku janë reformat dhe për vetë fazën ku ndodhet procesi i të bërit shtet s’do ishte më e mira që partneriteti ynë qeverisës të ndërpritej, pavarësisht se ne do shkojmë në këto zgjedhje për të marrë çdo votë të mundshme për PS. I takon palës tjetër, LSI-së, të vendosë në ditët në vijim pozicionin e saj për 4 vitet e ardhshme, ndërkohë, ne po diskutojmë me aletatët e tjerë, ndërkohë që s’do diskutojmë thellësinë e mëtejshme të reformave se këto reforma mund t’i bëjë vetëm PS, se Shqipërinë mund ta bëjë shtet vetëm PS. Çdo aleat duhet të jetë krenar dhe i nderuar që të jetë me ne në këtë betejë për të bërë shtet, jashtë kësaj rruge për të bërë shtet nuk ka nder, nuk ka krenari për asnjë parti. Nderi dhe krenaria janë këtu në këtë rrugë nën udhëheqjen e PS”- përfundoi Rama.
