Marrëveshja në Uashington të hënën për hapin tjetër, një takim bilateral mes presidentit rus Vladimir Putin dhe presidentit ukrainas Volodymyr Zelensky, u pranua njëzëri.
Pas tij, erdhi dhe informimi nga ndihmësi i Kremlinit, Yury Ushakov, mbi telefonatën mes presidentit Donald Trump dhe Putinit.
“U diskutua ideja që të shqyrtohet mundësia e rritjes së nivelit të përfaqësuesve nga ana ruse dhe ukrainase,” tha Ushakov. Në gjuhën e Kremlinit, kjo do të thotë se ata janë larg nga gati për takim, dhe ndoshta kurrë nuk do të jenë, shkruan CNN.
KJO është një luftë që filloi me njohjen njëanshme nga Putin të një pjese të territorit ukrainas (vetëquajtur Republikat Popullore të Donetskut dhe Luhanskut) si të pavarura, duke i quajtur “tokat tona historike”.
Ai ka argumentuar se Ukraina është “një pjesë e pandashme e historisë, kulturës dhe hapësirës shpirtërore të Rusisë,” dhe ndarja e saj nga Rusia është një gabim historik.
Kremlini nuk përpiqet të fshehë përbuzjen ndaj Zelensky. Ai jo vetëm që vënë në dyshim legjitimitetin e liderit ukrainas, duke u fiksuar tek shtyrja e zgjedhjeve për shkak të ligjit ushtarak, por në memorandumet e fundit për “paqen” kërkon që Ukraina të mbajë zgjedhje përpara çdo marrëveshjeje përfundimtare paqeje.
Putin dhe zyrtarë të tjerë rusë rrallë i referohen Zelensky me emër, duke përdorur shpesh epitetin përçmues “regjimi i Kievit”.
Mos harrojmë se ishte Zelensky ai që udhëtoi në Turqi për bisedimet e para direkte mes palëve në mes të majit, ndërsa Putin dërgoi një delegacion të kryesuar nga një shkrimtar i librave historikë.
Sipas CNN, Putin tashmë ka arritur atë që donte, një takim bilateral me Trump, një lider që ai e sheh si të barabartë. Një takim me Zelensky, nga pikëpamja e tij, do të ishte i papajtueshëm me vizionin e tij për botën dhe qëllimet e luftës së tij.
