Presidenti rus Vladimir Putin po shton përpjekjet për të siguruar financime për vazhdimin e luftës në Ukrainë, duke iu drejtuar drejtpërdrejt elitës së biznesit në vend.
Sipas raportimeve të Financial Times dhe platformës The Bell, në një takim të mbyllur me figura të mëdha të biznesit rus, Putin ka propozuar që oligarkët të japin kontribute të ashtuquajtura “vullnetare” për të mbështetur nevojat ushtarake.
Burime të cituara nga mediat ndërkombëtare bëjnë të ditur se ideja është nxitur nga Igor Sechin, një nga figurat më të fuqishme në sektorin energjetik rus. Ndër të parët që iu përgjigjën pozitivisht kërkesës thuhet se janë biznesmenët Oleg Deripaska dhe Suleiman Kerimov.
Megjithatë, mesazhi i Kremlinit ishte i qartë: lufta do të vazhdojë dhe nevojiten më shumë para për ta financuar atë, ndërsa për bizneset e mëdha këto “kontribute” nuk janë realisht opsionale.
Refuzimi për të kontribuar mund të sjellë pasoja të rënda për kompanitë dhe pronarët e tyre.
Zhvillimi vjen në një kohë kur kostot e luftës për Rusinë janë në rritje të vazhdueshme. Kremlini duket i vendosur për një konflikt afatgjatë, duke kërkuar burime të reja financimi për të mbështetur operacionet ushtarake.
Që nga fillimi i luftës, raportohet se asete me vlerë rreth 40 miliardë dollarë janë sekuestruar ose kaluar nën kontroll shtetëror nga kompani private në Rusi, një sinjal i qartë i presionit në rritje ndaj sektorit privat.
