Pas dëgjimit të 125 dëshmitarëve të Prokurorisë në Gjykatën Speciale në Hagë, avokati i ish-presidentit të Kosovës, Hashim Thaçi, Luka Misetiç, ka komentuar procesin dyvjeçar të gjykimit.
Misetiç theksoi se klientët e tij janë mbajtur padrejtësisht në paraburgim për 4 vjet e gjysmë, duke argumentuar se provat e Prokurorisë janë të dobëta dhe nuk mbështesin aktakuzën ndaj Thaçit, Veselit, Selimit dhe Krasniqit.
“Jam i zhgënjyer që u deshën mbi dy vjet e gjysmë për përfundimin e prezantimit të provave nga Prokuroria. Besoj se kjo çështje mund të ishte përmbyllur më shpejt, por jemi ku jemi tani,” deklaroi ai.
Misetiç shprehu optimizëm për epilogun e gjykimit, duke pretenduar se nuk ka dëshmitarë që e akuzojnë direkt Thaçin për krime lufte.
“Provat kundër z. Thaçi janë jashtëzakonisht të dobëta deri në atë pikë sa shpesh më ka lindur pyetja: Pse është akuzuar Thaçi?,” theksoi avokati.
Më 1 prill u mbyll faza e prezantimit të dëshmitarëve të Prokurorisë, por seanca për vazhdimin e procesit nuk ka një datë të caktuar. Thaçi dhe ish-krerët e UÇK-së janë deklaruar të pafajshëm për të gjitha akuzat që rëndojnë mbi ta.
