Vllaznia është kthyer në fushën stërvitore ditën e hënë, ku ka nisur përgatitjet për një javë të ngjeshur. Me shkodranët që nisin aktivitetin ditën e mërkurë kundër Elbasanit në kuadër të çerekfinaleve të kupës së Shqipërisë, e po ashtu në fundjavë ku presin në Shkodër, Bylisin për javën e 24-ët të Superiores.
Duele ku kërkohet angazhim maksimal dhe përqendrim në fushën e lojës nga ana e kuqebluve. Grupi i futbollistëve ka qenë i plotë nën urdhrat e trajnerit Brdariç, i cili do të ketë mundësi zgjedhjeje dhe rrotacioni në rast se vendos kështu.
Edhe Qato, që mungon prej disa javësh, është bashkuar me skuadrën. Por për mesfushorin vështirë se do të ketë minuta në ndeshjet e radhës. Rikthimi i tij i plotë në fushën e lojës pritet pas ndeshjes me Bylisin në kampionat.
Mungesë vijon të jetë Qarri që nga mesi i dhjetorit të kaluar. Gardiani pritet të kthehet i gatshëm në muajin mars. Pjesa tjetër e skuadrës ka qenë e plotë dhe e gatshme për të dhënë kontributin e tyre në ndeshjet e kësaj jave për shkodranët.
