Presidenti amerikan Donald Trump tha në një postim në rrjetin social se i ka udhëzuar këshilltarit të tij Steve Witkoff që të takohet me Presidentin rus Vladimir Putin në Moskë, për planin e paqes në lidhje me Ukrainën.
Në të njëjtën kohë, Nënsekretari i Mbrojtjes për Ushtrinë, Driscoll, do të takohet me Presidentin ukrainas Volodymyr Zelensky, për të njëjtën arsye.
Takimet do të zhvillohen “me shpresën e finalizimit” të marrëveshjes së paqes midis Rusisë dhe Ukrainës, shkruan presidenti amerikan.
Po sot, shefi i sigurisë së Ukrainës tha se shpreson të organizojë një vizitë të Presidentit Volodymyr Zelensky në SHBA “në datën më të afërt të përshtatshme” këtë muaj, ndërsa përpjekjet diplomatike për t’i dhënë fund luftës vazhdojnë.
Rustem Umerov, kreu i këshillit të sigurisë së Ukrainës, tha të martën se SHBA-të dhe Ukraina kishin arritur “një mirëkuptim të përbashkët mbi kushtet kryesore të marrëveshjes së diskutuar” në bisedimet e mëparshme në Gjenevë.
Shtëpia e Bardhë nuk ka komentuar mbi mundësinë e bisedimeve Trump-Zelensky. Ndërkohë, Sekretari i Ushtrisë Amerikane, Dan Driscoll, është takuar me përfaqësues rusë në Abu Dhabi. Nuk dihet se kush është në delegacionin rus.
