Lojtari i kombëtares së Ekuadorit, Marco Angulo, ka vdekur në moshën 22-vjeçare, pak më shumë se një muaj pasi u plagos rëndë në një aksident automobilistik. Lajmin e hidhur e ka bërë të ditur klubi i tij. Mesfushori i LDU Quito kishte qenë në spital që nga aksidenti i 7 tetorit në jug të kryeqytetit të Ekuadorit, Quito.
Raportet mjekësore thanë se ai iu nënshtrua disa operacioneve dhe kaloi mbi një javë në kujdes intensiv, përpara se të ndërronte jetë të hënën në mbrëmje.
“Me pikëllim të thellë duhet t’ju informojmë për vdekjen e lojtarit tonë të dashur, Marco Angulo, – shkroi LDU Quito, klub që luan në elitën e futbollit të Ekuadorit, në një deklaratë, të martën në mëngjes. – I përcjellim ngushëllimet tona familjes dhe të afërmve. Vdekja e tij është një humbje e pariparueshme, që do të lërë gjurmë të pashlyeshme në zemrat tona”.
Në pronësi të MLS FC Cincinnati, lojtari në fjalë iu bashkua LDU Quito në formë huazimi, me opsion për t’u blerë në mars. Angulo bëri 16 paraqitje për klubin ku ishte huazuar. Paraqitja e tij e fundit ndodhi më 6 tetor, një ditë para aksidentit me makinë.
Angulo bëri debutimin e tij me kombëtaren e Ekuadorit në nëntor 2022, duke hyrë si zëvendësues, në barazimin 0-0 kundër Irakut. Në total luajti tri ndeshje për kombëtaren e vendit të tij.
“Federata Ekuadoriane e Futbollit shpreh hidhërimin më të thellë për vdekjen e Marco Angulo, – thuhet në një deklaratë. – Marco nuk ishte vetëm një lojtar i jashtëzakonshëm, por edhe shok i madh skuadre. Ai lë pikëllim të thellë në zemrat tona, veçanërisht tek ata që patën udhëtime të panumërta me të në kampe stërvitore dhe ndeshje. Pusho në paqe, Angulito!”
Sipas raporteve ekuadoriane, futbollisti i Independiente del Valle, Roberto Cabezas dhe një mik i tyre, Victor Carcopa, gjithashtu vdiqën në aksidentin automobilistik. Më atë moment në makinë ndodheshin edhe dy pasagjerë të tjerë, por nuk dihet gjendja e tyre.
