Adam Mondschein, një nga aktorët e filmit “It Ends With Us”, ka reaguar pas deklaratave të Blake Lively, e cila pretendoi se një skenë lindjeje ishte xhiruar në mënyrë të papërshtatshme dhe joprofesionale. Lively shprehu pakënaqësi për faktin që një mik i regjisorit Justin Baldoni ishte përfshirë në një moment kaq intim, duke shtuar se ambienti ishte i parehatshëm dhe nuk ishin respektuar masat e zakonshme të mbrojtjes për aktorët.
Mondschein, i cili luante partnerin në skenë, reagoi përmes rrjeteve sociale duke mohuar çdo pretendim.
“Blake ishte e mbuluar plotësisht gjatë gjithë skenës. Ajo nuk shprehu asnjë shqetësim atë ditë, as gjatë e as pas xhirimeve,” u shpreh ai. Aktori shtoi se është i gatshëm të dëshmojë edhe në gjykatë nëse kërkohet.
Ky debat vjen në një kohë kur Blake Lively ka ngritur akuza serioze ndaj regjisorit Baldoni për ngacmim seksual dhe hakmarrje, ndërsa ai ka paraqitur një padi për shpifje dhe shantazh. Seanca gjyqësore pritet të mbahet në mars të vitit 2026.
