Një tërmet me magnitudë 5.2 të shkallës Rihter goditi juglindjen e Afganistanit, vetëm dy ditë pasi një tërmet tjetër me magnitudë 6 shkaktoi mbi 1,400 viktima dhe mijëra të plagosur në të njëjtin rajon, duke shtuar ndjeshëm shqetësimet për dëme të reja dhe pasoja të mëdha. Tërmeti i fundit u regjistrua në një thellësi të ulët prej 10 kilometrash, e njëjtë me atë të së dielës në mesnatë.
Ngjarja e fundit vjen pas një prej tërmeteve më shkatërruese që ka goditur Afganistanin në vitet e fundit, i cili rrafshoi fshatra të tëra në zona të izoluara malore. Deri më tani, nuk ka informacion të saktë mbi shkallën e dëmeve të tërmetit të sotëm. Peizazhi i vështirë malor po e pengon ndjeshëm punën e ekipeve të shpëtimit për të ofruar ndihmë në vendbanimet e prekura, sipas raportimeve të Al Jazeera.
Sipas të dhënave të fundit nga autoritetet talebane, të paktën 1,411 persona kanë humbur jetën, 3,124 janë plagosur, dhe mbi 5,400 banesa janë shembur. Këto të dhëna u konfirmuan nga zëdhënësi i qeverisë talebane, Zabihullah Mujahid. Organizata humanitare Gjysmëhëna e Kuqe Afgane ka shprehur shqetësimin se shumë persona mund të ndodhen ende nën rrënoja. Ndërkohë, Koordinatori i Kombeve të Bashkuara për Afganistanin paralajmëroi se numri i viktimave mund të rritet më tej.
Afganistani, një vend me terren të thyer dhe të izoluar, është veçanërisht i ndjeshëm ndaj tërmeteve vdekjeprurëse, sidomos në zonën malore të Hindukushit, ku përplasen pllakat tektonike indiane dhe euroaziatike. Provincat më të goditura nga tërmeti i fundit janë Kunar dhe Nangarhar, në pjesën lindore të vendit
