Partia Demokratike e drejtuar nga Enkelejd Alibeaj do të hapë zyrtarisht fushatën zgjedhore për 14 Majin më datë 18 prill. Lajmin e ka bërë me dije kryetari i komanduar Enkelejd Alibeaj, i cili do të prezantojë sloganin dhe kandidatin për Tiranën, profesorin Roland Bejko.
Slogani do të jetë “Frymëmarrje për Shqipërinë”, me të cilin do të prezantohen dhe kandidatët e tjerë në rrethe, ndërsa Tirana do të ketë një slogan të veçnatë, “Frymëmarrje për Tiranën”.
“Beteja që kemi për Tiranën merr një rëndësi të veçantë, është kryeqyteti i të gjithë shqiptarëve, qendra ekonomike, politike, konferenca e të gjithë Shqipërisë, ndaj mbështetja jonë për Roland Bejkon është për PD, për të ardhmen e PD. Jam i bindur që kandidatura dhe profili i Roland Bejkos është esenca e asaj çfarë në këto 30 vite PD do të duhej të ishte e çfarë duhet të jetë nesër”, tha Alibeaj.
Roland Bejko, kandidati i PD-së për Tiranën, u shpreh se plani i fushatës së tij do të jetë të zhvillojë sa më shumë takime në terren, duke trokitur në çdo derë. Ai shtoi se programi është hartuar nga profesionistë dhe ëhstë gati të prezantohet tek të gjitha grupet e interesit.
“Ne programin e kemi gati. Tezat e këtij program do bëhen publike ditën e çeljes dhe çdo pikë e këtij program do të prezantohet te grupet e interesit, banorët e zonave rurale dhe atje do flitet qartë, do thuhet e vërteta që është aleati ynë më i madh në këtë zgjedhje. Do kemi një rrugëtim intensiv por së bashku do ia dalim”, u shpreh Roland Bejko, në një konferencë për mediat krah Alibeajt.
