Parlamenti Evropian ka miratuar një rezolutë përmes së cilës nuk njeh Aleksandër Lukashenkon si president të Bjellorusisë, sapo mandati i tij aktual të përfundojë në nëntor.
Rezoluta hedh poshtë rezultatet e zgjedhjeve të muajit të kaluar, të cilat opozita bjelloruse dhe Perëndimi i kanë quajtur të manipuluara.
Rezulota, e cila u votua me 574 vota pro, 37 kundër dhe 82 abstenim, gjithashtu bën thirrje për zgjedhje të reja, të lira dhe të ndershme nën mbikëqyrjen ndërkombëtare.
“Sapo të mbarojë mandati i udhëheqësit të tanishëm autoritar, Alyaksandr Lukashenka, më 5 nëntor, parlamenti nuk do ta njohë më atë si president të vendit”, thuhet në deklaratën e PE.
Ministria e Jashtme e Bjellorusisë e quajti menjëherë rezolutën një ndërhyrje në punët e brendshme.
Shtetet anëtare të BE-së po punojnë aktualisht në ndalimin e vizave dhe ngrirjen e aseteve kundër zyrtarëve bjellorusë, të cilët blloku prej 27 vendesh, i sheh si përgjegjës për një goditje të ashpër ndaj protestave masive që nisën menjëherë pas zgjedhjeve të 9 gushtit.
