Fshati Tushemisht me “Zonjën nga qyteti”, Parkun natyror të Drilonit janë shndërruar në një pol të ri ekoturistik, jo vetëm për Pogradecin, por edhe Korçën.
Driloni apo Voloreka siç e quajnë pogradecarët vetëm 6 km larg Pogradecit është një nga mrekullitë natyrore dhe një nga atraksionet më të bukura në vendin tonë, ku investimet e realizuara me ndërtimin e rreth 4 000 m rrugica për këmbësorët që kanë zgjeruar sipërfaqen e parkut, kanë nxjerr më në pah potencialin turistik të kësaj zone.
Kryeministri Edi Rama ka publikuar në rrjetet sociale një performancë të veçantë muzikore nga violonçelisti i talentuar korçar, Riçard Gedaj, e interpretuar gjatë një lundrimi magjik në parkun e transformuar të Drilonit.
Driloni është një burim karstik që përbëhet nga tre vija uji që rrjedhin për t’u derdhur disa dhjetra metra më tej, në bregun jug-lindor të liqenit. Njëri prej tyre, ai më kryesori krijon një basen të madh ujor, ku mund të shëtitësh, vozitësh me varkë, të shijosh bukuritë e florës dhe faunës së pasur.
Rrugicat e ndërtuara lidhin të gjithë sipërfaqen nga burimet e Drilonit në fshatin Gurras, deri shëtitoren përgjatë liqenit të Ohrit.
Pemët e vërrisë, rrapit, plepit, shelgjeve lotues apo kallamishtet e bëjnë më të freskët dhe më të pastër ajrin. Ndërsa mjelmat dhe shpendët e tjerë që gjallojnë në këtë park natyror, ofrojnë një peizazh të mrekullueshëm.
Sipërfaqja ku shtrihet shëtitorja e Tushemishtit dhe Parku i Drilonit është shumëfishuar në 150 hektarë, e gjitha në funksion të turizmit, me 13 ura të reja, shëtitore, korsi biçikletash, 8 mijë pemë të mbjella, 5 km gjatësi e lundrueshme me varkë./ATSH
