Paniku ka përfshirë qytetarët në Spanjë dhe Portugali, pasi ndërprerja masive e energjisë ka paralizuar të dyja shtetet, duke shkaktuar mbylljen e rrjeteve të transportit dhe boshatisjen e rafteve të supermarketeve, mes frikës se kjo situatë mund të zgjasë për ditë të tëra.
Radhë të gjata u formuan jashtë dyqaneve, bankave dhe pikave të karburantit, ndërsa qytetarët dhe turistët përpiqeshin të siguronin ushqime bazë dhe para “cash”. Në aeroportet kryesore, shumë fluturime janë anuluar ose vonuar, me kompaninë TAP Air në Portugali që u kërkoi pasagjerëve të mos udhëtojnë drejt aeroporteve deri në një njoftim të dytë.
Në Madrid, një turist britanik e përshkroi situatën si “kaotike”, duke thënë për MailOnline: “Njerëzit kanë filluar të panikosen. Nëse energjia nuk rikthehet shpejt, situata do të përkeqësohet ndjeshëm.”
Autoritetet spanjolle u bënë thirrje qytetarëve që të mos udhëtojnë pa një arsye të rëndësishme, ndërsa liderët rajonalë kërkuan ndërhyrjen e ushtrisë për të menaxhuar krizën.
Ndërprerjet nisën rreth orës 12:30 të ditës lokale dhe prekën edhe centralet bërthamore, të cilat u ndalën automatikisht dhe kaluan në gjeneratorë për siguri. Transporti publik, përfshirë trenat dhe metrotë, u paralizua, duke detyruar evakuimin e pasagjerëve nga tunelet.
Operatori i rrjetit elektrik në Portugali paralajmëroi se rikthimi i energjisë mund të zgjasë deri në një javë. Pati luhatje të forta të tensionit dhe më pas ndërprerje totale, por ende shkaqet janë të paqarta.
Autoritetet spanjolle nuk përjashtojnë mundësinë që një sulm kibernetik të ketë ndikuar në krizë dhe kanë nisur një hetim urgjent.
Pamjet e publikuara tregojnë stacione treni dhe metro të mbushura me njerëz në errësirë
