Një gjykatë pakistaneze urdhëroi sot autoritetet që të numërojnë veçmas gjatë censusit që po zhvillohet në të gjithë vendin, anëtarët e një komuniteti të konsideruar si pasardhës të luftëtarit dhe pushtuesit të njohur, Aleksandri i Madh.
Kelasha, një komunitet me 4. 000 banorë, që jeton në rajonet malore pranë kufirit afgan, ruan doke fetare dhe kulturore të ndara nga myslimanët lokalë.
Pakistani, që renditet i gjashti në botë për nga numri i popullsisë, po zhvillon sërish pas 20 vitesh një census, pasi dhuna në vend e shtyu këtë proces, i cili duhej të ndodhte që në vitin 2008.
“Grumbullimi i të dhënave nënkupton individët dhe familjet që i përkasin besimit kryesor, atij islam, si edhe dy besimeve të tjera hinduizmit dhe kristianizmit, duke lënë jashtë besime minore si Kelasha”, thotë aktivisti Luke Rehmat, pasardhës i Aleksandrit të Madh.
Rehmat dhe aktivistë të tjerë depozituan një peticion në gjykatë, që komuniteti i tyre të numërohej veçmas.
“Gjykata vendosi në favorin tonë”, njoftoi Rehmati.
Kelashat janë pasardhës të ushtarëve të Aleksandrit të Madh, të cilët mbetën në ato vise, ndërkohë që ky i fundit marshoi drejt subkontinentit indian, për të famshmen Beteja e Hidaspesit, kundër mbretit Porus, i cili përdori edhe elefantët, por në fund pësoi një humbje katastrofike./ATA
