Më 16 prill 2025, në prag të zgjedhjeve parlamentare të 11 majit, Prezenca e OSBE-së në Shqipëri, në bashkëpunim me Prokurorinë e Përgjithshme, SPAK-un dhe projektin “EU4Justice”, organizoi një tryezë teknike të përqendruar në forcimin e hetimit dhe ndjekjes penale të krimeve zgjedhore.
Pjesëmarrësit, prokurorë nga SPAK-u dhe nga Prokuroritë e Juridiksionit të Përgjithshëm, diskutuan mbi praktikat më të mira për trajtimin e shkeljeve zgjedhore dhe forcimin e bashkëpunimit institucional. Dy ekspertë ndërkombëtarë nga Italia, të specializuar në krimet zgjedhore, kontribuan me njohuri dhe eksperiencë të vlefshme.
Tryeza shqyrtoi protokollet hetimore për korrupsionin zgjedhor dhe marrëveshjet e paligjshme mes aktorëve politikë dhe organizatave kriminale, duke u fokusuar në përdorimin e provave të ndryshme në proceset gjyqësore, përfshirë dëshmitë e bashkëpunëtorëve të drejtësisë dhe përgjimet elektronike.
Në fjalën e tyre, përfaqësuesit e OSBE-së theksuan rëndësinë e reagimit të shpejtë dhe transparent ndaj praktikave të dënueshme zgjedhore si shitblerja e votës, presioni mbi zgjedhësit dhe keqpërdorimi i burimeve administrative. Ata vunë në dukje se këto veprime vazhdojnë të reflektohen në raportet e vëzhgimit të zgjedhjeve nga OSBE/ODIHR.
Kjo tryezë është një hap tjetër në përpjekjet e OSBE-së për të mbështetur institucionet shqiptare në përmirësimin e hetimeve dhe ndjekjeve penale, sidomos në fushat që kanë ndikim të lartë si krimet zgjedhore. Përveç kësaj, Prezenca e OSBE-së ka mbështetur ndërtimin e kapaciteteve të Policisë së Shtetit dhe ka dhuruar pajisje kompjuterike për SPAK-un për të ndihmuar hetimet në terren.
