Ermir Rashica ka njoftuar largimin e tij zyrtar nga Skënderbeu përmes një postimi emocionues në rrjetet sociale. Sulmuesi, i cili ka qenë një nga lojtarët më të spikatur të dy sezoneve të fundit, i ka dhënë lamtumirën klubit korçar, duke shprehur mirënjohjen e tij për përvojën dhe mbështetjen që ka marrë.
Në mesazhin e tij, Rashica e përshkroi Skënderbeun si më shumë se një ekip, duke e cilësuar atë si një familje dhe një shtëpi të dytë. Ai falënderoi presidentin, drejtuesit e klubit, stafin teknik, bashkëlojtarët dhe tifozët e zjarrtë që e kanë mbështetur në çdo hap.
Largimi i tij lë një boshllëk të madh në sulmin e Skënderbeut, i cili tani duhet të gjejë alternativa për të përforcuar repartin ofensiv. Ende nuk dihet destinacioni i ardhshëm i Rashicës, por largimi i tij është një humbje e ndjeshme për Superioren.
