Gjithçka po bëhet gati për të nisur netët live të Festivalit të Këngës Magjike në Pallatin e Kongreseve. Ky edicion shënon vitin e 25-të, duke dëshmuar jetëgjatësinë, traditën dhe madhështinë e këtij festivali, që tashmë është kthyer në skenën më prestigjioze muzikore të vendit, por jo vetëm.
Në këtë vit të veçantë, producenti dhe moderatori Ardit Gjebrea e ndan skenën me vajzën e tij, Anna Gjebrea. Të dy përfaqësojnë gjenerata të ndryshme: Ardit Gjebrea mban me vete gjithë historinë dhe jetëgjatësinë e festivalit, ndërsa Anna Gjebrea përfaqëson të rinjtë me talent, plot jetë, që janë pjesë e skenës magjike.
28 këngëtarë në kategorinë “Big Artist” dhe 19 në kategorinë “New Artist” do të ndezin skenën e Këngës Magjike me performanca brilante përpara një jurie profesionale ndërkombëtare. Edicioni i këtij viti premton shumë surpriza.
Tre netët e festivalit zhvillohen në gjysmëfinalet e 19 dhe 20 nëntorit dhe në finalen e madhe të shtunën, 22 nëntor, ku kryefjalë do të jetë muzika e mirë dhe vokalet e jashtëzakonshme që i këndojnë dashurisë, ndjenjës, dhimbjes dhe asaj që na ofron jeta çdo ditë.
Ndërsa gjithçka bëhet gati për natën e parë, artistët me emër dhe të rinj provojnë emocionet e skenës në parakalim të fundit të performancave të tyre, përpara ballafaqimit me publikun.
Ky vit ka rikthyer në skenën e Këngës Magjike emra shumë të dashur për publikun, si dhe artistë që prej vitesh i kanë munguar skenës shqiptare. Artistë që dikur ishin pjesë e kategorisë “New” në këtë edicion vijnë në kategorinë “Big”, por të gjithë ata i bashkon emocionet e një brezi që janë rritur me magjinë e këtij festivali dhe sot do të ngjiten vetë në skenën e tij.
Po aq i madh është emocioni edhe i artistëve në kategorinë “New”, që ngjiten në këtë skenë të madhe jo vetëm për publikun, por edhe për jurinë, e cila do të vendosë nëse ata do të kalojnë në mbrëmjen finale të së shtunës.
Me hashtagun #BeMagic, Kënga Magjike po bën përgatitjet e fundit para nisjes së tre netëve të suksesshme muzikore, që do të pasurojnë kontributin që ky festival jep për artistët në trevat shqipfolëse.
Të mërkurë, të enjte dhe të shtunë, në ekranin e televizionit Kombëtar Klan dhe në skenën e Pallatit të Kongreseve do të përjetoni magjinë e muzikës.
