Portali Tirana Today nisi sot rrugëtimin e tij në tregun e mediave online në Shqipëri. Tirana Today kaloi online rreth orës 19:00, kur hapja u krye në një ceremoni të posaçme, në të cilën ishin të ftuar gazetarë të medias televizive, medias online dhe publicistë.
Tirana Today do të jetë zëri i atyre që nuk dëgjohen dhe kritik me cilëndo ngjyrë të pushtetit.
Përveç informacionit politik, ekonomik, social dhe sportiv, si pjesë bazike e çdo medie, Tirana Today, do të jetë një hapësirë e analizave, opinionit dhe transmetimit të mendimit të lirë e të vërtetë, duke i rezistuar formave të ndryshme të censurës.
Pavarësisht se bart emrin Tirana Today, informacioni nuk do të jetë i përqendruar vetëm mbi atë që ndodh në kryeqendrën e Shqipërisë, por do t’i kushtojë rëndësi edhe ngjarjeve politike, ekonomike dhe sociale në trevat shqiptare dhe atyre me ndikim global.
