Edhe pse i përjashtuar nga lista e parë e publikuar nga trajneri i ri i Brazilit, Carlo Ancelotti, sulmuesi Neymar Jr., aktualisht i huazuar te Santosi, nuk e fsheh aspak entuziazmin për Kampionatin Botëror 2026.
Në një intervistë të dhënë për platformën Disney+, ‘ylli’ brazilian foli me pasion për turneun që do të zhvillohet në Kanada, Meksikë dhe SHBA, duke e cilësuar si një edicion të paprecedentë:
“Do ta shihni çfarë do të jetë Kupa e Botës. Mendoj se do të jetë diçka e çmendur, mund të ndryshojë shumë gjëra! Është një gjë e mirë për të gjithë.”
Neymar, i cili njihet si fans i madh i NBA-së, ishte i ftuar si mysafir special në transmetimin e ndeshjes së katërt të Finaleve të Konferencës Perëndimore mes Minnesota Timberwolves dhe Oklahoma City Thunder. Ai u shpreh i mahnitur nga atmosfera e krijuar në arenat amerikane:
“Nuk shkon në një ndeshje basketbolli thjesht për të parë ndeshjen. Ka një shfaqje. Gjatë pushimeve, njerëzit kërcejnë. Pastaj në një pushim tjetër, tifozët hyjnë në fushë për të goditur në kosh. Para ndeshjes, dikush shumë i famshëm këndon himnin. Ata e bëjnë që t’ia vlejë barra qiranë.”
Duke reflektuar mbi mënyrën se si futbolli mund të përmirësohet në aspektin e argëtimit, Neymar shtoi:
“Në futboll ke një ndeshje 90-minutëshe dhe në pushim nuk ndodh asgjë. Të gjithë shkojnë tek hyrjet dhe flasin. Pse të mos bëhet diçka edhe brenda stadiumit? Diçka ndryshe? Argëtimi mund të përdoret në shumë forma, pa i prishur përqendrimin askujt.”
Në moshën 33-vjeçare, nëse rikthehet në formën optimale dhe Brazili siguron kualifikimin, Neymar mund të marrë pjesë në Botërorin e katërt në karrierë, me mundësinë të zgjerojë edhe më tej statusin e tij si golashënuesi më i mirë në historinë e “Seleção”-s.
Entuziazmi i tij është i qartë: Neymar është gati të shkëlqejë sërish në skenën më të madhe të futbollit botëror.
