Presidenti i Shteteve të Bashkuara, Donald Trump, ka shpallur zgjerimin e ndalimit të udhëtimit duke përfshirë pesë vende të tjera, ndërsa janë vendosur gjithashtu kufizime të reja për disa shtete. Vendimi, i marrë të martën, është pjesë e përpjekjeve të administratës për të forcuar standardet e hyrjes në SHBA për udhëtarët dhe emigrantët.
Sipas njoftimit të Shtëpisë së Bardhë, qytetarët e Burkina Fasos, Malit, Nigerit, Sudanit të Jugut dhe Sirisë nuk do të lejohen të hyjnë në SHBA, ndërsa personat me dokumente udhëtimi të lëshuara nga Autoriteti Palestinez do të ndalohen plotësisht.
Këto i shtohen listës me 12 vende që Trump shpalli në muajin qershor. Në atë kohë, ndalimi përfshinte Afganistanin, Mianmarin, Çadin, Republikën e Kongos, Guinenë Ekuatoriale, Eritrenë, Haitin, Iranin, Libinë, Somalinë, Sudanin dhe Jemenin, si dhe kufizime të shtuara për vizitorët nga Burundi, Kuba, Laosi, Sierra Leone, Togo, Turkmenistani dhe Venezuela.
Gjithashtu, siç shkruan Associated Press, me vendimin e ri të marrë sot, plot 15 vende të tjera, mes tyre Nigeria, Senegali, Zambia dhe Zimbabve, do të përballen me kufizime të pjesshme. Administrata Trump argumenton se shumë prej këtyre vendeve kanë probleme me korrupsionin, dokumentet e pasigurta civile, nivele të larta të shkeljes së vizave dhe mungesë stabiliteti qeveritar, gjë që e bën të vështirë verifikimin e qytetarëve të tyre.
“Ndalimet dhe kufizimet janë të nevojshme për të parandaluar hyrjen e shtetasve të huaj për të cilët SHBA nuk ka informacion të mjaftueshëm për të vlerësuar rreziqet që paraqesin,” thuhet në njoftimin e Shtëpisë së Bardhë.
Ky vendim vjen pas arrestimit të një shtetasi afgan të dyshuar për sulmin ndaj dy trupave të Gardës Kombëtare pranë Shtëpisë së Bardhë gjatë fundjavës së Festës së Falënderimeve.
