Kryetari i Partisë së Lirisë, Ilir Meta ka reaguar pas një denoncimi në media, ku një familje në zonën e Babrrusë ka pretenduar se zyrtarë të Partisë Socialiste i kanë premtuar 10 mijë lekë në këmbim të votës për Rakip Sulin.
“Përshëndes qëndrimin kurajoz të kësaj familje me dinjitet, që denoncon dhe refuzon paratë e Rilindjes për blerjen e votës”, shkruan Meta në rrjetet sociale.
Anëtarët e familjes Bregasi në Paskuqan kanë deklaruar për media se drejtuesi i njësisë administrative të Paskuqanit, Eduard Bregasi së bashku me kryeplakun e lagjes i kanë shkuar në shtëpi për t’i kërkuar kartat e identitetit në këmbim të 10 mijë lekëve të vjetra për të votuar Rakip Sulin.
“Na ka ardhur Bodini dhe na ka kërkuar kartat e identitetit dhe nuk ia dhamë. Na i kanë kërkuar për të votuar Rakip Sulin. Pse me karta do marrë qeverinë ai, duke nga gënjyer me 100 mijë lekë”, është shprehur anëtari i familjes Bregasi.
Sipas Metës: “Shqiptarët e kanë marrë vendimin. Ndryshimi më 14 Maj është i pandalshëm”.
