Cristina Palavra, bashkëshortja e futbollistit të Mallorca-s, Dani Rodríguez, ka denoncuar ngacmimet që ajo dhe tifozë të tjerë pësuan gjatë ndeshjes kundër Real Madridit (0-3) në gjysmëfinalet e Superkupës së Spanjës, që u zhvillua në stadiumin ‘Mbreti Abdullah’, në Jeddah, Arabi Saudite.
“Ishte paksa e ndërlikuar. Shkuam me fëmijët dhe nuk kishim siguri. E vërteta është që burrat e këtij vendi na fotografuan nga afër dhe na ngacmuan. Edhe Natalia, bashkëshortja e Dominik Greif, përjetoi të njëjtën gjë,” zbuloi ajo në programin ‘Esports IB3’.
Vetë futbollisti, duke mbështetur fjalët e bashkëshortes së tij, bëri kritika të ashpra:
“Një turp!!! Shkon me familjen tënde për të shijuar një ndeshje futbolli dhe… ku është organizimi i Federatës? Jo gjithçka është para!!!”
Natalia Kaluzova, bashkëshortja e portierit Dominik Greif, gjithashtu konfirmoi situatën për gazetën ‘Marca’:
“Pas ndeshjes, u mblodhëm në një grup të madh për t’u kthyer në hotel dhe gjithçka ndodhi ndërsa prisnim. Një grup njerëzish erdhi drejt nesh dhe na bënë video, na shtynë, na ofenduan në arabisht, na filmuan pa pëlqimin tonë dhe na sulmuan fizikisht,” tregoi ajo.
Një tifoz tjetër dha dëshminë e tij për ‘Cadena COPE’:
“Ishim shumë pak tifozë të Mallorca-s dhe askush nuk u kujdes për ne. Na përzien me tifozët vendas… Gjatë ndeshjes, shumë prej tyre na shqetësuan, talleshin me ne, provokonin fëmijët dhe të moshuarit. Ishte shumë e pakëndshme, por më e keqja ndodhi në fund të ndeshjes, rrugës për tek autobusi. Qindra njerëz na bërtitën, na fotografuan pa pëlqimin tonë, na qëlluan shuplaka… Ishte shumë e pakëndshme, por më e keqja ishte ajo që pësuan gratë. I prekën.”
