Në kuadër të 89-vjetorit të lindjes së shkrimtarit të njohur Ismail Kadare, Muzeu “Kadare” në Gjirokastër ka hapur dyert për vizitorët, duke ofruar një mundësi për t’u njohur me pasurinë letrare të këtij shkrimtari legjendar.
Muzeu është një kujtim i vazhdueshëm i veprës së Kadaresë, ku qyteti i Gjirokastrës është shpesh i pranishëm si motiv i shkrimeve të tij.
Bruno Pjetri, një nga ciceronët e muzeut, theksoi se ky vit ka një domethënie të veçantë, pasi shkrimtari nuk është më mes nesh, por ka lënë një trashëgimi të pasur letrare për brezat që do të vijnë. Pjetri theksoi gjithashtu se për gjirokastritët është një detyrim të lexojnë veprat e Kadaresë dhe të promovojnë më tej këtë trashëgimi në botë.
Vepra e Kadaresë është gjithashtu një mundësi për të njohur Gjirokastrën përmes historisë dhe traditave të saj. Për shumë turistë, qyteti është njohur përmes veprave të Kadaresë, ku janë përmendur kryeveprat si “Kronikë në gur”, “Princesha Argjiro” dhe “Darka e gabuar”, që shërbejnë si udhërrëfyes për të zbuluar thellësinë e kulturës dhe historisë gjirokastrite.
Në vitin 2024, muzeu tërhoqi rreth 10 mijë turistë, duke konfirmuar se vepra e Kadaresë vazhdon të mbetet një pikë kyçe e vizitave dhe promovimit të Gjirokastrës, një qytet i njohur për arkitekturën e tij të veçantë dhe lidhjet me letërsinë botërore.
Kadare, një nga shkrimtarët më të njohur shqiptarë, ndërroi jetë më 1 korrik 2024, në moshën 88 vjeçare, në Qendrën Spitalore Universitare “Nënë Tereza” në Tiranë. Kadare ka lënë një trashëgimi të jashtëzakonshme letrare, duke eksploruar mitet dhe historinë e Shqipërisë dhe duke luftuar komunizmin përmes veprave të tij. Ai është vlerësuar me shumë çmime ndërkombëtare dhe është njohur si një nga shkrimtarët më të mëdhenj të shekullit. Vepra e tij ka pasur ndikim të thellë në letërsinë botërore, dhe ka bërë të mundur që shumë njerëz të njohin Shqipërinë dhe historinë e saj.
