Franca dhe partnerët e saj ndërkombëtarë po përgatisin një mision detar mbrojtës me qëllim rihapjen e Ngushticës së Hormuzit ka deklaruar presidenti francez Emmanuel Macron gjatë një takimi trepalesh në Qipro me homologun qipriot Nikos Hristodhulidhis dhe kryeministrin grek Kyriakos Mitsotakis.
“Një mision plotësisht mbrojtës për shoqërimin e anijeve, në bashkëpunim me shtete evropiane dhe jo-evropiane, i cili synon që sapo të përfundojë faza më intensive e konfliktit të shoqërojë anijet me kontejnerë dhe cisternat, në mënyrë që të rihapet gradualisht Ngushtica e Hormuzit, një korridor jetik për tregtinë ndërkombëtare dhe për rrjedhën e gazit dhe naftës nga rajoni”, u shpreh Macron.
Gjatë takimit Makron dhe Mitsotakis, shprehën solidaritet me Qipron pas goditjeve të fundit në ishull nga dronë të prodhimit iranian duke theksuar se mbrojtja e ishullit mesdhetar është një çështje jetike për Greqinë, Francën dhe Bashkimin Evropian.
Fakti që jam këtu pranë jush së bashku me Kryeministrin e Greqisë është një mënyrë për t’ju thënë se kur sulmohet Qiproja, sulmohet edhe Evropa”, tha Macron.
“Prania juaj këtu përveç se ka një simbolikë të fortë, ka edhe rëndësi reale për Qipron dhe për gjithë Evropën”, u shpreh presidenti i Qipros, Nikos Christodoulidis.
Nga ana e tij kryeministri grek Kyriakos Mitsotakis theksoi se Qiproja nuk është dhe nuk do të mbetet kurrë e vetme, ndërsa kujtoi praninë e menjëhershme të forcave greke në ishull.
“Së bashku me Presidentin Nikos Christodoulidis dhe Presidentin francez Emmanuel Macron, dërgojmë një mesazh të fortë, të përbashkët, të qartë dhe të vendosur për unitet dhe solidaritet. Qiproja e familjes evropiane nuk është dhe nuk do të mbetet kurrë vetëm”, u shpreh kryeministri i Greqisë Kyriakos Mitsotakis.
Ndërkohë, në Qipro kanë dislokuar forca ushtarake disa vende evropiane, mes tyre Greqia dhe Franca, ndërsa autoritetet mbeten në gatishmëri të lartë pas alarmeve të fundit për dronë pranë bazave britanike në ishull.
