Paniku i krijuar pak orë më parë se ishin shpërndarë më herët tezat e provimit të matematikës, solli edhe reagimin nga radhët e politikës. Ishte deputeti demokrat Luçiano Boçi, i cili i shkoi kësaj historie deri në fund, madje duke ndarë me ndjekësit edhe testin në fjalë.
Kaq mjaftoi që të vinte një reagim nga vetë Ministria e Arsimit, duke i’u drejtuar me një apel të hapur Prokurorisë, që të nisë hetimet, për të zbuluar se kush i nxori testet dhe në këtë formë shkelësit të vihen para ligjit.
Njoftimi per shtyp i Ministrisë së Arsimit
“Ministria e Arsimit, Sportit dhe Rinisë, u informua nga rrjetet sociale dhe mediat on-line lidhur me publikimin e disa fotove nga Testi i Matematikes qe u zhvillua në të gjithë vendin, nga ora 10:00 -12:30. Konkretisht nga adresat në Facebook e një qytetari dhe të një deputeti janë postuar foto të testit të matematikës, ndërsa testimi po zhvillohej në të gjithë vendin.
MASR garanton publikun se ka marrë çdo masë që parashikon ligji për të garantuar fshehtësinë dhe integritetin e testeve të maturës në fazën e hartimit dhe shpërndarjes ne 38 DAR dhe ZA, 206 mjediset ku zhvillohet provimi për 37 mijë maturantë, të cilët mbikëqyren nga rreth 4300 administratorë dhe monitorues.
Ministria e Arsimit, Rinisë dhe Sporteve, e konsideron shkelje te rendë të ligjit Nr.69/2012 “Për sistemin arsimor parauniversitar në RSH” dhe të akteve nënligjore, kopjimin e plotë apo te pjesshëm si dhe shpërndarjen dhe publikimin e testit.
Për këtë arsye, i kërkojmë organit të prokurorisë të fillojë hetimin e menjëhershëm të dy rasteve të bëra publike online, duke mundësuar vënien përball ligjit të shkelësve, kushdo qofshin ata”.
